23 פקודי

38.21 אֵ֣לֶּה פְקוּדֵ֤י הַמִּשְׁכָּן֙ מִשְׁכַּ֣ן הָעֵדֻ֔ת אֲשֶׁ֥ר פֻּקַּ֖ד עַל־פִּ֣י מֹשֶׁ֑ה, עֲבֹדַת֙ הַלְוִיִּ֔ם בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן.

38.22 וּבְצַלְאֵ֛ל בֶּן־אוּרִ֥י בֶן־ח֖וּר לְמַטֵּ֣ה יְהוּדָ֑ה, עָשָׂ֕ה אֵ֛ת כָּל־אֲשֶׁר־צִוָּ֥ה יְהוָ֖ה אֶת־מֹשֶֽׁה.
38.23 וְאִתּ֗וֹ אָהֳלִיאָ֞ב בֶּן־אֲחִיסָמָ֛ךְ לְמַטֵּה־דָ֖ן, חָרָ֣שׁ וְחֹשֵׁ֑ב, וְרֹקֵ֗ם בַּתְּכֵ֙לֶת֙ וּבָֽאַרְגָּמָ֔ן, וּבְתוֹלַ֥עַת הַשָּׁנִ֖י וּבַשֵּֽׁשׁ.

38.24 כָּל־הַזָּהָ֗ב הֶֽעָשׂוּי֙ לַמְּלָאכָ֔ה בְּכֹ֖ל מְלֶ֣אכֶת הַקֹּ֑דֶשׁ, וַיְהִ֣י זְהַ֣ב הַתְּנוּפָ֗ה תֵּ֤שַׁע וְעֶשְׂרִים֙ כִּכָּ֔ר, וּשְׁבַ֨ע מֵא֧וֹת וּשְׁלֹשִׁ֛ים שֶׁ֖קֶל בְּשֶׁ֥קֶל הַקֹּֽדֶשׁ.

38.25 וְכֶ֛סֶף פְּקוּדֵ֥י הָעֵדָ֖ה מְאַ֣ת כִּכָּ֑ר, וְאֶלֶף֩ וּשְׁבַ֨ע מֵא֜וֹת וַחֲמִשָּׁ֧ה וְשִׁבְעִ֛ים שֶׁ֖קֶל בְּשֶׁ֥קֶל הַקֹּֽדֶשׁ.
38.26 בֶּ֚קַע לַגֻּלְגֹּ֔לֶת, מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ, לְכֹ֨ל הָעֹבֵ֜ר עַל־הַפְּקֻדִ֗ים מִבֶּ֨ן עֶשְׂרִ֤ים שָׁנָה֙ וָמַ֔עְלָה, לְשֵׁשׁ־מֵא֥וֹת אֶ֙לֶף֙ וּשְׁלֹ֣שֶׁת אֲלָפִ֔ים וַחֲמֵ֥שׁ מֵא֖וֹת וַחֲמִשִּֽׁים.

38.27 וַיְהִ֗י מְאַת֙ כִּכַּ֣ר הַכֶּ֔סֶף לָצֶ֗קֶת אֵ֚ת אַדְנֵ֣י הַקֹּ֔דֶשׁ וְאֵ֖ת אַדְנֵ֣י הַפָּרֹ֑כֶת, מְאַ֧ת אֲדָנִ֛ים לִמְאַ֥ת הַכִּכָּ֖ר, כִּכָּ֥ר לָאָֽדֶן.
38.28 וְאֶת־הָאֶ֜לֶף וּשְׁבַ֤ע הַמֵּאוֹת֙ וַחֲמִשָּׁ֣ה וְשִׁבְעִ֔ים עָשָׂ֥ה וָוִ֖ים לָעַמּוּדִ֑ים, וְצִפָּ֥ה רָאשֵׁיהֶ֖ם וְחִשַּׁ֥ק אֹתָֽם.

38.29 וּנְחֹ֥שֶׁת הַתְּנוּפָ֖ה שִׁבְעִ֣ים כִּכָּ֑ר, וְאַלְפַּ֥יִם וְאַרְבַּע־מֵא֖וֹת שָֽׁקֶל.
38.30 וַיַּ֣עַשׂ בָּ֗הּ אֶת־אַדְנֵי֙ פֶּ֚תַח אֹ֣הֶל מוֹעֵ֔ד, וְאֵת֙ מִזְבַּ֣ח הַנְּחֹ֔שֶׁת, וְאֶת־מִכְבַּ֥ר הַנְּחֹ֖שֶׁת אֲשֶׁר־ל֑וֹ, וְאֵ֖ת כָּל־כְּלֵ֥י הַמִּזְבֵּֽחַ.
38.31 וְאֶת־אַדְנֵ֤י הֶֽחָצֵר֙ סָבִ֔יב, וְאֶת־אַדְנֵ֖י שַׁ֣עַר הֶחָצֵ֑ר, וְאֵ֨ת כָּל־יִתְדֹ֧ת הַמִּשְׁכָּ֛ן וְאֶת־כָּל־יִתְדֹ֥ת הֶחָצֵ֖ר סָבִֽיב.

39.1 וּמִן־הַתְּכֵ֤לֶת וְהָֽאַרְגָּמָן֙ וְתוֹלַ֣עַת הַשָּׁנִ֔י, עָשׂ֥וּ בִגְדֵי־שְׂרָ֖ד לְשָׁרֵ֣ת בַּקֹּ֑דֶשׁ, וַֽיַּעֲשׂ֞וּ אֶת־בִּגְדֵ֤י הַקֹּ֙דֶשׁ֙ אֲשֶׁ֣ר לְאַהֲרֹ֔ן, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.2 וַיַּ֖עַשׂ אֶת־הָאֵפֹ֑ד, זָהָ֗ב, תְּכֵ֧לֶת, וְאַרְגָּמָ֛ן, וְתוֹלַ֥עַת שָׁנִ֖י, וְשֵׁ֥שׁ מָשְׁזָֽר.
39.3 וַֽיְרַקְּע֞וּ אֶת־פַּחֵ֣י הַזָּהָב֮, וְקִצֵּ֣ץ פְּתִילִם֒, לַעֲשׂ֗וֹת בְּת֤וֹךְ הַתְּכֵ֙לֶת֙, וּבְת֣וֹךְ הָֽאַרְגָּמָ֔ן, וּבְת֛וֹךְ תּוֹלַ֥עַת הַשָּׁנִ֖י, וּבְת֣וֹךְ הַשֵּׁ֑שׁ, מַעֲשֵׂ֖ה חֹשֵֽׁב.
39.4 כְּתֵפֹ֥ת עָֽשׂוּ־ל֖וֹ חֹבְרֹ֑ת, עַל־שְׁנֵ֥י קְצוֹתָ֖יו חֻבָּֽר.

39.5 וְחֵ֨שֶׁב אֲפֻדָּת֜וֹ אֲשֶׁ֣ר עָלָ֗יו, מִמֶּ֣נּוּ הוּא֮ כְּמַעֲשֵׂהוּ֒, זָהָ֗ב, תְּכֵ֧לֶת, וְאַרְגָּמָ֛ן, וְתוֹלַ֥עַת שָׁנִ֖י, וְשֵׁ֣שׁ מָשְׁזָ֑ר, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.6 וַֽיַּעֲשׂוּ֙ אֶת־אַבְנֵ֣י הַשֹּׁ֔הַם, מֻֽסַבֹּ֖ת מִשְׁבְּצֹ֣ת זָהָ֑ב, מְפֻתָּחֹת֙ פִּתּוּחֵ֣י חוֹתָ֔ם, עַל־שְׁמ֖וֹת בְּנֵ֥י יִשְׂרָאֵֽל.
39.7 וַיָּ֣שֶׂם אֹתָ֗ם עַ֚ל כִּתְפֹ֣ת הָאֵפֹ֔ד, אַבְנֵ֥י זִכָּר֖וֹן לִבְנֵ֣י יִשְׂרָאֵ֑ל, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.8 וַיַּ֧עַשׂ אֶת־הַחֹ֛שֶׁן, מַעֲשֵׂ֥ה חֹשֵׁ֖ב, כְּמַעֲשֵׂ֣ה אֵפֹ֑ד, זָהָ֗ב, תְּכֵ֧לֶת, וְאַרְגָּמָ֛ן, וְתוֹלַ֥עַת שָׁנִ֖י, וְשֵׁ֥שׁ מָשְׁזָֽר.
39.9 רָב֧וּעַ הָיָ֛ה, כָּפ֖וּל עָשׂ֣וּ אֶת־הַחֹ֑שֶׁן, זֶ֧רֶת אָרְכּ֛וֹ וְזֶ֥רֶת רָחְבּ֖וֹ, כָּפֽוּל.

39.10 וַיְמַלְאוּ־ב֔וֹ אַרְבָּעָ֖ה ט֣וּרֵי אָ֑בֶן: ט֗וּר אֹ֤דֶם, פִּטְדָה֙, וּבָרֶ֔קֶת, הַטּ֖וּר הָאֶחָֽד.
39.11 וְהַטּ֖וּר הַשֵּׁנִ֑י: נֹ֥פֶךְ, סַפִּ֖יר, וְיָהֲלֹֽם.
39.12 וְהַטּ֖וּר הַשְּׁלִישִׁ֑י: לֶ֥שֶׁם, שְׁב֖וֹ, וְאַחְלָֽמָה.
39.13 וְהַטּוּר֙ הָֽרְבִיעִ֔י: תַּרְשִׁ֥ישׁ, שֹׁ֖הַם, וְיָשְׁפֵ֑ה, מֽוּסַבֹּ֛ת מִשְׁבְּצ֥וֹת זָהָ֖ב בְּמִלֻּאֹתָֽם.

39.14 וְ֠הָאֲבָנִים עַל־שְׁמֹ֨ת בְּנֵי־יִשְׂרָאֵ֥ל הֵ֛נָּה, שְׁתֵּ֥ים עֶשְׂרֵ֖ה עַל־שְׁמֹתָ֑ם, פִּתּוּחֵ֤י חֹתָם֙, אִ֣ישׁ עַל־שְׁמ֔וֹ, לִשְׁנֵ֥ים עָשָׂ֖ר שָֽׁבֶט.
39.15 וַיַּעֲשׂ֧וּ עַל־הַחֹ֛שֶׁן שַׁרְשְׁרֹ֥ת גַּבְלֻ֖ת, מַעֲשֵׂ֣ה עֲבֹ֑ת, זָהָ֖ב טָהֽוֹר.
39.16 וַֽיַּעֲשׂ֗וּ שְׁתֵּי֙ מִשְׁבְּצֹ֣ת זָהָ֔ב, וּשְׁתֵּ֖י טַבְּעֹ֣ת זָהָ֑ב, וַֽיִּתְּנ֗וּ אֶת־שְׁתֵּי֙ הַטַּבָּעֹ֔ת עַל־שְׁנֵ֖י קְצ֥וֹת הַחֹֽשֶׁן.
39.17 וַֽיִּתְּנ֗וּ שְׁתֵּי֙ הָעֲבֹתֹ֣ת הַזָּהָ֔ב עַל־שְׁתֵּ֖י הַטַּבָּעֹ֑ת, עַל־קְצ֖וֹת הַחֹֽשֶׁן.
39.18 וְאֵ֨ת שְׁתֵּ֤י קְצוֹת֙ שְׁתֵּ֣י הָֽעֲבֹתֹ֔ת, נָתְנ֖וּ עַל־שְׁתֵּ֣י הַֽמִּשְׁבְּצֹ֑ת, וַֽיִּתְּנֻ֛ם עַל־כִּתְפֹ֥ת הָאֵפֹ֖ד, אֶל־מ֥וּל פָּנָֽיו.

39.19 וַֽיַּעֲשׂ֗וּ שְׁתֵּי֙ טַבְּעֹ֣ת זָהָ֔ב, וַיָּשִׂ֕ימוּ עַל־שְׁנֵ֖י קְצ֣וֹת הַחֹ֑שֶׁן, עַל־שְׂפָת֕וֹ אֲשֶׁ֛ר אֶל־עֵ֥בֶר הָאֵפֹ֖ד בָּֽיְתָה.
39.20 וַֽיַּעֲשׂוּ֮ שְׁתֵּ֣י טַבְּעֹ֣ת זָהָב֒, וַֽיִּתְּנֻ֡ם עַל־שְׁתֵּי֩ כִתְפֹ֨ת הָאֵפֹ֤ד מִלְמַ֙טָּה֙, מִמּ֣וּל פָּנָ֔יו, לְעֻמַּ֖ת מֶחְבַּרְתּ֑וֹ, מִמַּ֕עַל לְחֵ֖שֶׁב הָאֵפֹֽד.
39.21 וַיִּרְכְּס֣וּ אֶת־הַחֹ֡שֶׁן, מִטַּבְּעֹתָיו֩ אֶל־טַבְּעֹ֨ת הָאֵפֹ֜ד, בִּפְתִ֣יל תְּכֵ֗לֶת, לִֽהְיֹת֙ עַל־חֵ֣שֶׁב הָאֵפֹ֔ד, וְלֹֽא־יִזַּ֣ח הַחֹ֔שֶׁן מֵעַ֖ל הָאֵפֹ֑ד, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.22 וַיַּ֛עַשׂ אֶת־מְעִ֥יל הָאֵפֹ֖ד, מַעֲשֵׂ֣ה אֹרֵ֑ג, כְּלִ֖יל תְּכֵֽלֶת.
39.23 וּפִֽי־הַמְּעִ֥יל בְּתוֹכ֖וֹ כְּפִ֣י תַחְרָ֑א, שָׂפָ֥ה לְפִ֛יו סָבִ֖יב, לֹ֥א יִקָּרֵֽעַ.

39.24 וַֽיַּעֲשׂוּ֙ עַל־שׁוּלֵ֣י הַמְּעִ֔יל רִמּוֹנֵ֕י תְּכֵ֥לֶת וְאַרְגָּמָ֖ן וְתוֹלַ֣עַת שָׁנִ֑י, מָשְׁזָֽר.
39.25 וַיַּעֲשׂ֥וּ פַעֲמֹנֵ֖י זָהָ֣ב טָה֑וֹר, וַיִּתְּנ֨וּ אֶת־הַפַּֽעֲמֹנִ֜ים בְּת֣וֹךְ הָרִמֹּנִ֗ים, עַל־שׁוּלֵ֤י הַמְּעִיל֙ סָבִ֔יב, בְּת֖וֹךְ הָרִמֹּנִֽים.
39.26 פַּעֲמֹ֤ן וְרִמֹּן֙, פַּעֲמֹ֣ן וְרִמֹּ֔ן, עַל־שׁוּלֵ֥י הַמְּעִ֖יל סָבִ֑יב, לְשָׁרֵ֕ת, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.27 וַֽיַּעֲשׂ֛וּ אֶת־הַכָּתְנֹ֥ת שֵׁ֖שׁ, מַעֲשֵׂ֣ה אֹרֵ֑ג, לְאַהֲרֹ֖ן וּלְבָנָֽיו.
39.28 וְאֵת֙ הַמִּצְנֶ֣פֶת שֵׁ֔שׁ, וְאֶת־פַּאֲרֵ֥י הַמִּגְבָּעֹ֖ת שֵׁ֑שׁ, וְאֶת־מִכְנְסֵ֥י הַבָּ֖ד שֵׁ֥שׁ מָשְׁזָֽר.
39.29 וְֽאֶת־הָאַבְנֵ֞ט שֵׁ֣שׁ מָשְׁזָ֗ר, וּתְכֵ֧לֶת, וְאַרְגָּמָ֛ן, וְתוֹלַ֥עַת שָׁנִ֖י, מַעֲשֵׂ֣ה רֹקֵ֑ם, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.30 וַֽיַּעֲשׂ֛וּ אֶת־צִ֥יץ נֵֽזֶר־הַקֹּ֖דֶשׁ, זָהָ֣ב טָה֑וֹר, וַיִּכְתְּב֣וּ עָלָ֗יו מִכְתַּב֙ פִּתּוּחֵ֣י חוֹתָ֔ם: "קֹ֖דֶשׁ לַיהוָֽה".
39.31 וַיִּתְּנ֤וּ עָלָיו֙ פְּתִ֣יל תְּכֵ֔לֶת, לָתֵ֥ת עַל־הַמִּצְנֶ֖פֶת מִלְמָ֑עְלָה, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

39.32 וַתֵּ֕כֶל כָּל־עֲבֹדַ֕ת מִשְׁכַּ֖ן אֹ֣הֶל מוֹעֵ֑ד, וַֽיַּעֲשׂוּ֙ בְּנֵ֣י יִשְׂרָאֵ֔ל כְּ֠כֹל אֲשֶׁ֨ר צִוָּ֧ה יְהוָ֛ה אֶת־מֹשֶׁ֖ה, כֵּ֥ן עָשֽׂוּ.

39.33 וַיָּבִ֤יאוּ אֶת־הַמִּשְׁכָּן֙ אֶל־מֹשֶׁ֔ה: אֶת־הָאֹ֖הֶל וְאֶת־כָּל־כֵּלָ֑יו, קְרָסָ֣יו, קְרָשָׁ֔יו, בְּרִיחָ֖יו, וְעַמֻּדָ֥יו, וַאֲדָנָֽיו.
39.34 וְאֶת־מִכְסֵ֞ה עוֹרֹ֤ת הָֽאֵילִם֙ הַמְאָדָּמִ֔ים, וְאֶת־מִכְסֵ֖ה עֹרֹ֣ת הַתְּחָשִׁ֑ים, וְאֵ֖ת פָּרֹ֥כֶת הַמָּסָֽךְ.
39.35 אֶת־אֲרֹ֥ן הָעֵדֻ֖ת, וְאֶת־בַּדָּ֑יו, וְאֵ֖ת הַכַּפֹּֽרֶת.
39.36 אֶת־הַשֻּׁלְחָן֙, אֶת־כָּל־כֵּלָ֔יו, וְאֵ֖ת לֶ֥חֶם הַפָּנִֽים.
39.37 אֶת־הַמְּנֹרָ֨ה הַטְּהֹרָ֜ה, אֶת־נֵרֹתֶ֗יהָ, נֵרֹ֛ת הַמַּֽעֲרָכָ֖ה, וְאֶת־כָּל־כֵּלֶ֑יהָ, וְאֵ֖ת שֶׁ֥מֶן הַמָּאֽוֹר.
39.38 וְאֵת֙ מִזְבַּ֣ח הַזָּהָ֔ב, וְאֵת֙ שֶׁ֣מֶן הַמִּשְׁחָ֔ה, וְאֵ֖ת קְטֹ֣רֶת הַסַּמִּ֑ים, וְאֵ֕ת מָסַ֖ךְ פֶּ֥תַח הָאֹֽהֶל.
39.39 אֵ֣ת מִזְבַּ֣ח הַנְּחֹ֗שֶׁת, וְאֶת־מִכְבַּ֤ר הַנְּחֹ֙שֶׁת֙ אֲשֶׁר־ל֔וֹ, אֶת־בַּדָּ֖יו, וְאֶת־כָּל־כֵּלָ֑יו, אֶת־הַכִּיֹּ֖ר, וְאֶת־כַּנּֽוֹ.
39.40 אֵ֩ת קַלְעֵ֨י הֶחָצֵ֜ר, אֶת־עַמֻּדֶ֣יהָ, וְאֶת־אֲדָנֶ֗יהָ, וְאֶת־הַמָּסָךְ֙ לְשַׁ֣עַר הֶֽחָצֵ֔ר, אֶת־מֵיתָרָ֖יו, וִיתֵדֹתֶ֑יהָ, וְאֵ֗ת כָּל־כְּלֵ֛י עֲבֹדַ֥ת הַמִּשְׁכָּ֖ן לְאֹ֥הֶל מוֹעֵֽד.
39.41 אֶת־בִּגְדֵ֥י הַשְּׂרָ֖ד לְשָׁרֵ֣ת בַּקֹּ֑דֶשׁ, אֶת־בִּגְדֵ֤י הַקֹּ֙דֶשׁ֙ לְאַהֲרֹ֣ן הַכֹּהֵ֔ן, וְאֶת־בִּגְדֵ֥י בָנָ֖יו לְכַהֵֽן.
39.42 כְּכֹ֛ל אֲשֶׁר־צִוָּ֥ה יְהוָ֖ה אֶת־מֹשֶׁ֑ה, כֵּ֤ן עָשׂוּ֙ בְּנֵ֣י יִשְׂרָאֵ֔ל אֵ֖ת כָּל־הָעֲבֹדָֽה.

39.43 וַיַּ֨רְא מֹשֶׁ֜ה אֶת־כָּל־הַמְּלָאכָ֗ה, וְהִנֵּה֙ עָשׂ֣וּ אֹתָ֔הּ כַּאֲשֶׁ֛ר צִוָּ֥ה יְהוָ֖ה, כֵּ֣ן עָשׂ֑וּ, וַיְבָ֥רֶךְ אֹתָ֖ם מֹשֶֽׁה.

40.1 וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר:

40.2 “בְּיוֹם־הַחֹ֥דֶשׁ הָרִאשׁ֖וֹן, בְּאֶחָ֣ד לַחֹ֑דֶשׁ, תָּקִ֕ים אֶת־מִשְׁכַּ֖ן אֹ֥הֶל מוֹעֵֽד.”
40.3 “וְשַׂמְתָּ֣ שָׁ֔ם אֵ֖ת אֲר֣וֹן הָעֵד֑וּת, וְסַכֹּתָ֥ עַל־הָאָרֹ֖ן אֶת־הַפָּרֹֽכֶת.”
40.4 “וְהֵבֵאתָ֙ אֶת־הַשֻּׁלְחָ֔ן, וְעָרַכְתָּ֖ אֶת־עֶרְכּ֑וֹ, וְהֵבֵאתָ֙ אֶת־הַמְּנֹרָ֔ה, וְהַעֲלֵיתָ֖ אֶת־נֵרֹתֶֽיהָ.”

40.5 “וְנָתַתָּ֞ה אֶת־מִזְבַּ֤ח הַזָּהָב֙ לִקְטֹ֔רֶת לִפְנֵ֖י אֲר֣וֹן הָעֵד֑וּת, וְשַׂמְתָּ֛ אֶת־מָסַ֥ךְ הַפֶּ֖תַח לַמִּשְׁכָּֽן.”
40.6 “וְנָ֣תַתָּ֔ה אֵ֖ת מִזְבַּ֣ח הָעֹלָ֑ה לִפְנֵ֕י פֶּ֖תַח מִשְׁכַּ֥ן אֹֽהֶל־מוֹעֵֽד.”
40.7 “וְנָֽתַתָּ֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ, וְנָתַתָּ֥ שָׁ֖ם מָֽיִם.”
40.8 “וְשַׂמְתָּ֥ אֶת־הֶחָצֵ֖ר סָבִ֑יב, וְנָ֣תַתָּ֔ אֶת־מָסַ֖ךְ שַׁ֥עַר הֶחָצֵֽר.”

40.9 “וְלָקַחְתָּ֙ אֶת־שֶׁ֣מֶן הַמִּשְׁחָ֔ה, וּמָשַׁחְתָּ֥ אֶת־הַמִּשְׁכָּ֖ן וְאֶת־כָּל־אֲשֶׁר־בּ֑וֹ, וְקִדַּשְׁתָּ֥ אֹת֛וֹ וְאֶת־כָּל־כֵּלָ֖יו, וְהָ֥יָה קֹֽדֶשׁ.”
40.10 “וּמָשַׁחְתָּ֛ אֶת־מִזְבַּ֥ח הָעֹלָ֖ה וְאֶת־כָּל־כֵּלָ֑יו, וְקִדַּשְׁתָּ֙ אֶת־הַמִּזְבֵּ֔חַ, וְהָיָ֥ה הַמִּזְבֵּ֖חַ קֹ֥דֶשׁ קָֽדָשִֽׁים.”
40.11 “וּמָשַׁחְתָּ֥ אֶת־הַכִּיֹּ֖ר וְאֶת־כַּנּ֑וֹ, וְקִדַּשְׁתָּ֖ אֹתֽוֹ.”

40.12 “וְהִקְרַבְתָּ֤ אֶֽת־אַהֲרֹן֙ וְאֶת־בָּנָ֔יו אֶל־פֶּ֖תַח אֹ֣הֶל מוֹעֵ֑ד, וְרָחַצְתָּ֥ אֹתָ֖ם בַּמָּֽיִם.”
40.13 “וְהִלְבַּשְׁתָּ֙ אֶֽת־אַהֲרֹ֔ן אֵ֖ת בִּגְדֵ֣י הַקֹּ֑דֶשׁ, וּמָשַׁחְתָּ֥ אֹת֛וֹ, וְקִדַּשְׁתָּ֥ אֹת֖וֹ, וְכִהֵ֥ן לִֽי.”
40.14 “וְאֶת־בָּנָ֖יו תַּקְרִ֑יב, וְהִלְבַּשְׁתָּ֥ אֹתָ֖ם כֻּתֳּנֹֽת.”
40.15 “וּמָשַׁחְתָּ֣ אֹתָ֗ם כַּאֲשֶׁ֤ר מָשַׁ֙חְתָּ֙ אֶת־אֲבִיהֶ֔ם, וְכִהֲנ֖וּ לִ֑י, וְ֠הָיְתָה לִהְיֹ֨ת לָהֶ֧ם מָשְׁחָתָ֛ם לִכְהֻנַּ֥ת עוֹלָ֖ם לְדֹרֹתָֽם.”

40.16 וַיַּ֖עַשׂ מֹשֶׁ֑ה, כְּ֠כֹל אֲשֶׁ֨ר צִוָּ֧ה יְהוָ֛ה אֹת֖וֹ, כֵּ֥ן עָשָֽׂה.

40.17 וַיְהִ֞י בַּחֹ֧דֶשׁ הָרִאשׁ֛וֹן בַּשָּׁנָ֥ה הַשֵּׁנִ֖ית, בְּאֶחָ֣ד לַחֹ֑דֶשׁ, הוּקַ֖ם הַמִּשְׁכָּֽן.
40.18 וַיָּ֨קֶם מֹשֶׁ֜ה אֶת־הַמִּשְׁכָּ֗ן, וַיִּתֵּן֙ אֶת־אֲדָנָ֔יו, וַיָּ֙שֶׂם֙ אֶת־קְרָשָׁ֔יו, וַיִּתֵּ֖ן אֶת־בְּרִיחָ֑יו, וַיָּ֖קֶם אֶת־עַמּוּדָֽיו.
40.19 וַיִּפְרֹ֤שׂ אֶת־הָאֹ֙הֶל֙ עַל־הַמִּשְׁכָּ֔ן, וַיָּ֜שֶׂם אֶת־מִכְסֵ֥ה הָאֹ֛הֶל עָלָ֖יו מִלְמָ֑עְלָה, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.
40.20 וַיִּקַּ֞ח וַיִּתֵּ֤ן אֶת־הָעֵדֻת֙ אֶל־הָ֣אָרֹ֔ן, וַיָּ֥שֶׂם אֶת־הַבַּדִּ֖ים עַל־הָאָרֹ֑ן, וַיִּתֵּ֧ן אֶת־הַכַּפֹּ֛רֶת עַל־הָאָרֹ֖ן מִלְמָֽעְלָה.
40.21 וַיָּבֵ֣א אֶת־הָאָרֹן֮ אֶל־הַמִּשְׁכָּן֒, וַיָּ֗שֶׂם אֵ֚ת פָּרֹ֣כֶת הַמָּסָ֔ךְ, וַיָּ֕סֶךְ עַ֖ל אֲר֣וֹן הָעֵד֑וּת, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

40.22 וַיִּתֵּ֤ן אֶת־הַשֻּׁלְחָן֙ בְּאֹ֣הֶל מוֹעֵ֔ד, עַ֛ל יֶ֥רֶךְ הַמִּשְׁכָּ֖ן צָפֹ֑נָה, מִח֖וּץ לַפָּרֹֽכֶת.
40.23 וַיַּעֲרֹ֥ךְ עָלָ֛יו עֵ֥רֶךְ לֶ֖חֶם לִפְנֵ֣י יְהוָ֑ה, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

40.24 וַיָּ֤שֶׂם אֶת־הַמְּנֹרָה֙ בְּאֹ֣הֶל מוֹעֵ֔ד, נֹ֖כַח הַשֻּׁלְחָ֑ן, עַ֛ל יֶ֥רֶךְ הַמִּשְׁכָּ֖ן נֶֽגְבָּה.
40.25 וַיַּ֥עַל הַנֵּרֹ֖ת לִפְנֵ֣י יְהוָ֑ה, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.
40.26 וַיָּ֛שֶׂם אֶת־מִזְבַּ֥ח הַזָּהָ֖ב בְּאֹ֣הֶל מוֹעֵ֑ד, לִפְנֵ֖י הַפָּרֹֽכֶת.
40.27 וַיַּקְטֵ֥ר עָלָ֖יו קְטֹ֣רֶת סַמִּ֑ים, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

40.28 וַיָּ֛שֶׂם אֶת־מָסַ֥ךְ הַפֶּ֖תַח לַמִּשְׁכָּֽן.
40.29 וְאֵת֙ מִזְבַּ֣ח הָעֹלָ֔ה שָׂ֕ם פֶּ֖תַח מִשְׁכַּ֣ן אֹֽהֶל־מוֹעֵ֑ד, וַיַּ֣עַל עָלָ֗יו אֶת־הָעֹלָה֙ וְאֶת־הַמִּנְחָ֔ה, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

40.30 וַיָּ֙שֶׂם֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ, וַיִּתֵּ֥ן שָׁ֛מָּה מַ֖יִם לְרָחְצָֽה.
40.31 וְרָחֲצ֣וּ מִמֶּ֔נּוּ מֹשֶׁ֖ה וְאַהֲרֹ֣ן וּבָנָ֑יו, אֶת־יְדֵיהֶ֖ם וְאֶת־רַגְלֵיהֶֽם.
40.32 בְּבֹאָ֞ם אֶל־אֹ֣הֶל מוֹעֵ֗ד, וּבְקָרְבָתָ֛ם אֶל־הַמִּזְבֵּ֖חַ, יִרְחָ֑צוּ, כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה.

40.33 וַיָּ֣קֶם אֶת־הֶחָצֵ֗ר סָבִיב֙ לַמִּשְׁכָּ֣ן וְלַמִּזְבֵּ֔חַ, וַיִּתֵּ֕ן אֶת־מָסַ֖ךְ שַׁ֣עַר הֶחָצֵ֑ר, וַיְכַ֥ל מֹשֶׁ֖ה אֶת־הַמְּלָאכָֽה.

40.34 וַיְכַ֥ס הֶעָנָ֖ן אֶת־אֹ֣הֶל מוֹעֵ֑ד, וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן.
40.35 וְלֹא־יָכֹ֣ל מֹשֶׁ֗ה לָבוֹא֙ אֶל־אֹ֣הֶל מוֹעֵ֔ד, כִּֽי־שָׁכַ֥ן עָלָ֖יו הֶעָנָ֑ן, וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן.

40.36 וּבְהֵעָל֤וֹת הֶֽעָנָן֙ מֵעַ֣ל הַמִּשְׁכָּ֔ן, יִסְע֖וּ בְּנֵ֣י יִשְׂרָאֵ֑ל בְּכֹ֖ל מַסְעֵיהֶֽם.
40.37 וְאִם־לֹ֥א יֵעָלֶ֖ה הֶעָנָ֑ן, וְלֹ֣א יִסְע֔וּ עַד־י֖וֹם הֵעָלֹתֽוֹ.
40.38 כִּי֩ עֲנַ֨ן יְהוָ֤ה עַֽל־הַמִּשְׁכָּן֙ יוֹמָ֔ם, וְאֵ֕שׁ תִּהְיֶ֥ה לַ֖יְלָה בּ֑וֹ, לְעֵינֵ֥י כָל־בֵּֽית־יִשְׂרָאֵ֖ל בְּכָל־מַסְעֵיהֶֽם.